Mann vart feilaktig fengsla: – Alvorleg feil, seier retten

Ein mann i 30-åra vart i Helgeland tingrett dømd til 3 år og 3 månader i fengsel. Saka er anka, og dommen er ikkje rettskraftig. Trass i dette vart mannen sendt til soning, utan at retten fekk ta stilling til om han skulle varetektsfengslast. Først to veker etter at han vart sett i fengsel, vart fengslingsmøtet gjennomført.
– Ved ein alvorleg feil vart tiltalte overførte til soning den 06.11.2023 då det vart feilaktig lagt til grunn at dommen frå tingretten var rettskraftig. Det skulle her vore kravd framleis fengsling og den sikta er halden utan lovleg heimel i varetekt sidan då, skriv tingrettsdommar Maren Elisabeth Nilsen Nygaard i avgjerda.
Mannen er dømd for kroppskrenking, fridomskrenking, grovt ran, ulovleg væpning og tjuveri. Og retten meiner at faren for gjentaking er til stades viss mannen skulle bli lauslaten no.
– Den sikta har uhøveleg vorte innsett for soning i 2 veker då påtalemakta – feilaktig la til grunn at det ikkje låg føre ein anke over avgjerda i lagmannsretten og at ein gjekk ut frå at dommen var rettskraftig. Dette er ein alvorleg feil. Retten kan likevel ikkje sjå at dette gjer framleis fengsling til eit uhøveleg inngrep, heiter det i rettsavgjerda.
Og retten gir tommel opp til fire veker i varetekt for mannen.