Tildelt leiarpris for 2023

Direktør ved Nordlandssjukehuset Siri Tau Ursin har fått Legeforeininga sin leiarpris for 2023.
Det opplyser foreininga i ei pressemelding.
– Det er heilt fantastisk å vite at eg har fått prisen. Det er ei stor ære og ei anerkjenning som betyr mykje for meg, seier Ursin.
Prisen blei delt ut på Legeforeininga sitt landsstyremøte i Bodø tysdag 6. juni. Det kom inn 32 forslag til kandidatar.
Ursin meiner det er viktig at legar går inn i leiarstillingar, både administrativt og fagleg.
– Eg vil oppfordre kollegaer til å bli leiarar. Eg har hatt gode leiarar rundt meg og gjekk inn i leiarstillingar nettopp på grunn av gode leiarar. På lik linje med at ein spesialiserer seg i andre fag, meiner eg at ein skal legge til rette for at legar kan få støtte og vilkår som gjer at dei vel leiing, seier ho.
Leiar i Allmennlegeforeininga, Nils Kristian Klev, seier Ursin er sterk og dyktig.
– Prisvinnaren utmerker seg som ein sterk og dyktig leiar. Hennar medisinsk faglege kompass og bondevett er unike eigenskapar som har vore avgjerande for å leie sjukehus på ein vellukka måte, seier han.