Stor stein stenger skule i Lofoten

I april vart ein person hardt skadd etter eit steinras på vegen til Vikten i Flakstad.
I løpet av natt til tysdag har ein stein på rundt 500 kilo rast ut frå fjellsida og hamna i vegbana på fylkesveg 7600, skriv Lofotposten.
Difor har Vikten skule bestemt seg for å stenge skulen i dag.
– Den første observasjonen av steinen var klokka halv seks på morgonen, seier styreleiar ved skulen Brengt Ole Henriksen til avisa.
Og avgjersla om å halde skulen stengt i dag var enkel å ta.
– Vegen er såpass risikabel no. Det køyrer 20 elevar gjennom der to gangar om dagen. Ein blir engsteleg for situasjonen. Den siste tida har det vore mykje regn, noko som aukar risikoen for ytterlegare ras, seier Henriksen.
Det er usikkert om det har rast meir stein saman med blokka, men Henriksen seier at det har vore fleire steinsprang på vegen sidan raset i april.
Skuleleiinga vil ta ei ny vurdering i løpet av dagen og sjå an vêret om det blir nødvendig å halde stengt i fleire dagar.